Þurfti að fara á spítala áðan útaf ennisholusýkingu sem er búin að malla í mér lengi lengi. Hélt ég gæti nú tæklað þetta með allskonar töfrabrögðum sjálf en allt kom fyrir ekki. Það var ekki fyrr en ég hélt að hægra augað í mér myndi annað hvort detta úr hausnum á mér eða ég myndi sjálf skafa það út með skeið, sem ég ákvað að drullast til læknis.
Fékk rótsterk sýklalyf sem eru svo uppfull af E-efnum að ég hef varla lyst á að taka þau. Afhverju þurfa að vera fleiri en eitt litarefni í pillum??? gargggg

Jæja nóg af þessu röfli og nú byrjar alvöru röflið. Ég sá langa biðröð og sá fram á bið bið bið eftir að komast að. Svo ég fór í blaðabunkann á borðinu til að finna mér eitthvað til að lesa. En það var nú eiginlega hægarasagt en gert. Ekki beint skemmtiefni sem boðið er uppá þarna. Ég endaði á að spila tölvuleik í símanum eins og gelgja í staðinn fyrir að blaða í gegnum þessar þunglyndisbókmenntir sem voru í boði.

Hérna kemur þetta í þeirri röð eins og þetta var á borðinu, allskonar tímarit og bæklingar.
Krabbameinssjúk börn, Parkinson, Uppeldi, Bólusetningar, Astmi, Verkjameðferðir, beinþynning, hættum að reykja, VIKAN mars 2009, Sjúkraþjálfun, Tímarit hjúkkunema, astmi og ofnæmi, alnæmisblað, Lions blað, ADHD fréttabréf, Geðvernd ofl. ofl.

Og þá kemur rúsínan í pulsuendanum….. efst á bunkanum var forláta barnabók, Ljóti andarunginn…………. á spænsku !

Amma mín segir alltaf að henni líði eins og nýhreinsuðum hundi ef henni líður vel. Nú vona ég að ég verði eins og nýhreinsaður hundur eftir 24 daga. Er búin að vera í kroppahreinsun, semsagt að hætta að borða allt sem er skemmtilegt eins og glútein, mjólk, áfengi, kaffi, E-efni, skordýraeitur og þessháttar.
Þetta er í fyrsta skipti sem ég hef ekki haft neina löngun í sælgæti – HALELUUUJA !!! Á meira segja kókosbollu upp í skáp sem ég er að spá í að klessa í ramma og hengja bara uppá vegg því mér finnst þetta svo merkilegt.

Reyndar át ég einhvern bókhveitigraut í gær og í morgun. Það er álíka skemmtilegt og að háma í sig morgunblaðið. Alveg eins og skeinipappír á bragðið ojbara. Held ég sleppi þessu næstu morgna og geri eins og hin vaxtaræktatröllin og ét hrá egg og banana, allt betra en þessi hörmung.

Kötturinn hefur grennst. Hann kemst nú inn um lúguna án mikillar áreynslu þannig að hann þarf ekki á svona hreinsun að halda eins og er og er ánægður á megrunarfóðrinu.

Svo eru það auðvitað aðalfréttirnar að það eru allir að unga út börnum í kringum mig. Fyrst Frikki og Kattie vinir okkar, svo Jói og Erika í London og nú síðast í gær Elena mágkona mín og Þórir. Til hamingju með það allt saman. Ég get reyndar rétt svo munað hvaða kyn börnin eru sem fæðast þessa dagana. Get alls ekki munað hvenær þau fæddust, hvað þau voru stór, þung og allt það, nema stelpan hennar Elenu fæddist þriðja, þriðja kl þrjú – snilldar skipulag alveg :)

ps. Hrós vikunnar fá gröfukarlarnir hér i bæ. Við erum enn að drukkna í sköflum hérna og það líður orðið varla sá dagur að Tollfríður festi ekki bílinn í innkeyrslunni og endaði ég á að fara og kaupa heimsins stærstu snjóskóflu í gær – hún er svo stór og löng að ég lofta henni varla. Gröfukarlarnir okkar eru búnir að kyppa bílnum upp 3var sinnum og moka burtu mörgum tonnum af snjó og eiga þeir kærar þakkir skilið fyrir það :)

Er komin í skúringaverkfall. Held það sé auðveldara að rífa bara parketið af reglulega. Drengurinn kemur heim og nær alltaf ALLLLLLTAF að hella einhverju í gólfið og ef það er ekki hann þá ælir kötturinn eða ég sjálf missi heila skyrdollu í gólfið. Sérstaklega erfitt var að ná bingókúlulakkrísslefi og svo gömlum banana úr gólfinu og ég tala nú ekki um límmiðana úff.

Er að reyna að siða hann til og láta hann þrífa upp eftir sig og svo fer hann reglulega í skammarkrókinn þar sem hann á að dúsa í 2 mínútur en hann heldur að hann eigi að vera þar í 2 sekúndur. Hann reyndar biður orðið um að horfa á súpunanní (Super Nanny – Jo Frost) og finnst ægilega gaman að sjá óþekku krakkana.
Hann er líka greinilega hræddur um að fá ekki nóg að borða hérna og er farinn að fela mat hingað og þangað. Ég fann um daginn svo vonda lykt og skildi ekkert í því hvaðan hún kom. Fannst ég fyrst finna hana inní stofu og svo inní eldhúsi og svo aftur inní stofu. Hélt ég væri að verða klikkuð þangað til við fundum skýringuna. Úlfur kom þrammandi með mjólkurstútkönnu og jeremííías þvílík fýla. Hann hafði semsagt fengið sér sopa af kasúldinni mjólk og helt niður á peysuna sína og í gólfið (auðvitað) þegar honum líkaði ekki bragðið. Peysunni var hent í þvottavélina og drengnum í jólabaðið.

En lyktin hélt áfram að gjósa upp þó allt væri orðið hreint og fínt…. og viti menn. Við fundum svo eitt af forðabúrum Úlfsins. Ofaní litla bílnum hans sem hann situr á og þeysist um gólfið hérna. Ekkert skrítið að lyktin var aldrei á sama stað. Ofan í skottinu var slatti af cheerios, hrökkbrauð og svo auðvitað úldna mjólkin sem hafði lekið úr könnunni hans 1700ogsúrkál ásamt bók. Hann hefur aldeilis ætlað að hafa það huggulegt.

Hérna er svo mynd af bílnum og uppvöskunardrengnum í fína dressinu sem ég bjó til handa honum, til að vera í við húsverkin.

Á sunnudaginn ætlar mosófólk að setja heimsmet í knúsi. Pant ekki vera þar!!!
Mig hryllir alveg við því að vera í margmenni. Áran mín höndlar það ekki. Svo er ég skíthrædd að ég fengi frunsu eða lús hrollur……
Næsta vika á að vera einhver knúsvika, meira bullið. Hverjir finna uppá svona? Barnalandsmussur og kerlingar sem eru alltaf að senda óþolandi englapósta og væmnar barnamyndir á mann og hafa ekkert annað að gera en að keyra uppí sveit til að faðma ókunnugt fólk. Örugglega.
Held að það sé nóg að uppáhaldsdagurinn minn bolludagur sé á næsta leyti, ásamt sprengidegi og öskudegi. Svo er búið að klína á okkur valentínusardeginum líka með allskonar rómantísku veseni. Hnussss

Reyndi að útskýra bolludag fyrir útlendingunum okkar þegar við vorum stödd í bakaríinu í Glæsibæ um helgina og þau voru að spá í bollurnar í borðinu. Að reyna að útskýra þetta fyrirbæri sem eitthvað heilbrigt er næstum ómögulegt. Börnin búa til flengingarvendi og svo keppist fólk um að vakna sem fyrst til að flengja hvort annað. Bolla bolla bolla o.s.frv.
Vinkona mín útskýrði fyrir dönskum vinum sínum að þetta væri Bolledag…..

Sprengidaginn er ekkert mál að útskýra…… Blow day á fallegri ensku…. eða þannig.

Og svo öskudagur. Ja hann er nú bara orðin eins og einhver amerísk hrekkjavaka. Ég sakna öskupokanna og títuprónanna sem var hægt að beygja.

Jæja karlinn að koma heim best að setja sig í nöldurgírinn fyrst ég er byrjuð á þessu röfli.

Google Translate er svo frábært.
Hérna er síðasta færsla mín þýdd yfir á ensku og svo aftur yfir á íslensku.

Magavöðva Troll
Hefur einhver prófað að ryksuga 2 hæða hús með Slender tón belti á magann í botn?
Já ég!
Nú ligg ég alveg aftur í harðsperrum frá helvíti fyrir framan sjónvarpið og horfa á Americas Next Top fyrirmynd og hamar mér drasl. Gee I Great!
Góðar stundir

PS. Ég í raun sönnun þess að tvær sterkar íbúfen bjór og lagi allan heim harðsperrur og orðasambönd.

Hefur einhver prófað að ryksuga 2ja hæða hús með slendertone belti á maganum í botni??
Já ég !
Núna ligg ég gersamlega bakk í harðsperrum frá helvíti fyrir framan sjónvarpið og glápi á Americas next top model og háma í mig drasl. Djöfull verð ég flott !
Góðar stundir

ps. Hef reyndar sönnun fyrir því að tvær sterkar íbúfen og bjór lagi allar heimsins harðsperrur og strengi.

Hef haft ógurlega mikið að gera og lítið skrifað. Úlfur var veikur og er aftur veikur og hangir með horinn í brókunum mínum. Ég er líka mjög upptekin í megrun eins og er. Þ.e er að megra fressið okkar sem festist í kattalúgunni um daginn. Það var hræðilegt að horfa á hann – eins og að horfa á fæðingu. Hann dettur næstum úr framlappaliðunum við að troða sér í gegnum lúguna og svo situr hann fastur á belgnum og þarf að jugga sér upp og niður til að smjúga svo loksins í gegn.

Hann er semsagt kominn í mikið át-tak. Því miður er ekki til heilsuhæli hérna fyrir feit dýr eins og bollurnar sem eru á hælinu hérna í Hveró. Þannig að við Tollfríður þurfum að passa að hann borði ekki of mikið. Bleyta í matnum hans svo hann taki meira pláss í bumbunni á honum og setja hann svo reglulega út að hreyfa sig. Setti hann tvisvar út áðan og svo efst upp í stiga þar sem hann steinsefur núna (átti að skokka niður).

Þegar ég horfði á þátt um feit gæludýr um daginn þá varð mér öllum lokið. Þegar kettirnir eru orðnir svona feitir þurfa eigendurnir að skeina þá með blautþurrkum því þeir geta það ekki sjálfir !!!
Ég hef nóg með að skeina mig og svo strákinn sem harðneitar að kúka í klósett – hvað þá að ég fari að skeina kettina líka. Aumingja Gosi fyrst kveikir hann í rassinum á sér og svo er hann kominn á sérfæði og í æfingaplan. Væri ekki hissa að hann stryki að heiman ef hann myndi nenna því. Hann nennti reyndar að stela ristabrauðinu hans Úlfs í hádeginu og sleikti allt smjörið af því !

Var að kíkja á veður.is. Er orðin svoooo mikil kerling að ég er með Vegagerðina og veðrið í favorites hjá mér. Fannst nú nóg um spána á morgun en ekki skánar hún og guði sé lof að þetta nær bara fram á þriðjudag ojojojojjojjjjjj.

Það er svo dimmt og drungalegt á morgnana að ég kveiki á kerti í glugganum hjá mér til að fá smá lifandi birtu í herbergið meðan ég vinn. Lá við stórslysi í gær þegar kattarhlunkurinn ákvað að stökkva upp í gluggann, eins mikil lipurtá og hann er. Og þar sem hann er allt allt of feitur og klossaður settist hann á fína ilmkertið mitt og það kviknaði í rassinum á honum. Ég rauk til og lamdi og lamdi í rassgatið á honum til að slökkva. Hann hlunkaðist svo niður sármóðgaður yfir þessum flengingum, fór niður og fékk sér að éta.

Það er ennþá svakaleg fýla af brunnum kattarasshárum í herberginu :p

Var að finna eldgamla filmu sem var tekin á lomo vélina mína áður en hún datt í sundur. Held filman sé síðan árið 2000 eða 1999.
Flestar myndirnar voru nú ónýtar en nokkrar eru enn ok. þessi t.d. Veit einhver hvar þetta er tekið??

Við fyrstu sýn dettur manni í hug flóttamannabúðir. Hvít tjöldin, draslið, rauðakrossjeppar, og svo auðvitað litlu fátæku börnin sem eru annað hvort að veiða sér í matinn í baneitraðri tjörninni eða krækja sér í drasl til að fara með í endurvinnslu til að sjá fjölskyldunni fararborða.

Afsakið orðbragðið á eftir…… ég er nú soddan dama……..

Einhleyp vinkona mín stynur mikið og andvarpar yfir gömlum frænkum sem eru að gera hana gráhærða í jólaboðum, erfidrykkjum og öðru álíka skemmtilegu. Kerlingarnar spyrja hvað sé nú eiginlega í gangi með hana en hún eigi nú bara eitt barn. Hvurslags þetta sé eiginlega og barnið orðið það gamalt að það gæti verið barnapía fyrir næstu börn. Hún verði nú bara að fara að ná sér í mann blalblbllblblallbalbabbb.

Við ræddum þetta í gærkvöldi og komumst að þeirri niðurstöðu að þetta væri nú meiri helv….. forvitnin og dónaskapurinn. Hvað kemur þeim þetta við. Hún var að spá hvort hún ætti að segja að enginn vildi hana eða hún finndi engan nógu flottan. En best væri að þrykkja einhverju til baka í þær þannig að helst myndu þær nú fá slag eða allavega alvarleg andköf og hjartsláttatruflanir.

Planið er að í næstu veislu mun hún borða súkkulaði köku og kjammsa á henni meðan hún segir þeim (eftir að þær spurja hana) að það sé nú frekar erfitt að búa til börn þar sem það sé nú í tísku að rí……… í rassg……!!!

Held að einhleypir strákar séu ekki spurðir svona. Þeir eru bara spurðir út í vinnuna og hvort þeir eigi ennþá sama bílinn. Enda eiga þeir nóg af spriklandi sæðisfrumum fram undir 100 ára og í fínum málum með framleiðslu á krakkakrumpum með hjálp Viagra :p Ekki komnir á síðasta söludag eins og við kellingarnar grrrr

Finnst eins og sumar konur viti allt og hvernig eigi að bregðast við öllu. Ég hélt að þegar ég yrði mamma þá myndi ég uppgreitast sjálfkrafa í svona übermömmu sem væri með allt á tæru og ákveðnin uppmáluð. En sagan varð eiginlega allt önnur. Í staðinn fyrir að breytast í ofurbarnalandsgribbu sem hefur skoðanir á öllu og engu varð ég óttaleg mús sem er með skitusting úr hræðslu við að gera eitthvað vitlaust.
Núna er afkvæmið lasið og búið að vera lasið alla vikuna. Þetta þykir mér svakalega slæmt og listarnir í hausnum á mér verða lengri og lengri þegar ég reyni að sofna………
• Ath. hvort við eigum næga stíla,
• Ath skiptitösku
• ef ekki þar þá veskið mitt
• ef ekki það hummm þá þarf að fara í apótek
• skipuleggja hvenær á að fara í apótek
• guð minn eini ef það er um nótt hvaða apótek er þá opið?
• Muna að taka veskið með
• hmmmm ef kortinu mínu væri nú synjað betra að hafa bara pening
• fara í hraðbanka
• best að kaupa nóg af stílum þegar komið er í apótekið og eitthvað meira sem vantar
• hvað vantar?
• dömubindi….. muna það.
• Varasalva….næstum búinn…. muna það.
• hmmmm kannski ætti ég að hringja í lækni
• finna símanúmerið hafa það reddý
• Ef ég þarf að fara með hann á ég þá að fara á Selfoss eða Reykjavík? – best að hafa smá áhyggjur af því
• Ef ég þarf að fara í Reykjavík þá fer ég í lyfju í leiðinni (ef þetta er um miðja nótt)
• muna að líta í spegil áður en ég labba út – gæti verið með maskara eða slef út á kinnar
• hmmm ætti ég að hita bílinn fyrst?
• er nóg bensín á bílnum? ohhh þoli ekki að þurfa að fara í bensínsjálfsala
• muna að hafa bensínlykilinn með
• er síminn hlaðinn ef ég festist uppá heiði?
• nú ef ég festist þar þá þarf ég að hafa mat og drykk með handa stubbanum (sem er fárveikur afturí)
• muna kennitöluna hans
• pissa – best að vera búin að pissa áður en ég legg af stað

þetta er náttúrlega bilun !!!

Ætlaði aldrei að minnast á IceSave en ég bara varð að setja þetta inn. Fann í sumar gamlan gerilista frá Tolla og tók mynd. Eins og sjá má stendur þarna í punkti númer 6 – IceSave.
Vorum semsagt búin að fylla út umsókn og stuff en vorum of miklir skussar til að senda það inn á sínum tíma ;)
Eins held ég að bíllinn sé enn á sömu dekkjum og við löguðum aldrei NAD magnarann eða Herman miller stólinn…….

Gleðilegt árið þeir sem enn nenna að lesa blogg en hanga ekki bara á feisbúkk.
Er ekki með neitt áramótaheit nema kannski að teikna meira og minnka nethangsið. Alveg búin að gefast upp á einhverjum át-tökum, hættaaðnaganeglurdæmi o.s.frv. Er gift og get verið heima í herfugallanum allan daginn.
Byrjaði reyndar að taka eina mynd á dag (sjá hérna til hliðar) fyrir áramót og ætla að sjá hvort þetta takist. Sýnist ég nota símann mest í það verk.

Annars er gerilistinn fyrir árið orðinn all svakalegur. Þegar maður er orðinn algjör kerling með stórt hús, karl, krakka, gæludýr og garð þá er nóg að gera. Hefur reyndar alltaf verið smávegis Monica Bing í mér í sambandi við gerilista. Og núna er ég með hið fullkomna kerfi í notkun sem ég fann hérna hjá Sigga á font.is.
Ég nota litla þunna moliskinnubók í þetta og er á bók númer 2 núna.
Held að ef ég passi mig ekki fái ég einhversskonar skipulagsáráttu. Ég er t.d andvaka stundum nótt eftir nótt að búa til lista í hausnum um hitt og þetta sem þarf að gera. Held reyndar að konur búi bara til svona lista, karlar eru of uppteknir við að dreyma brjóst.

Það er ofsalega erfitt að vera næstum 2ja ára núna. Úlfurinn er búinn að fá að háma í sig nammi og drasl og fara seint að sofa eins og hver önnur gelgja. Fór kasúldinn í leikskólann í morgun eftir mikil mótmæli. Svo er bara áframhald á strangri dagskrá, klósettþjálfun, sofaísínurúmiíheilanótt, vera með nýja lambhúshettu og hafa gleraugun á nebbanum.
Vona að hann strjúki ekki að heiman.

Maður lenti nú oft í ævintýrum þegar maður var að ferðast með strætó í London. Einu sinni var vagninn gersamlega troðinn og við stóðum í honum miðjum og ég skildi bara ekkert í þessari hrææææðilegu fýlu sem ég fann. Og hún þokaðist nær og nær. Fyrir aftan mig stóð þá róni sem hafði ekki farið í jólabaðið, ja við skulum segja í nokkur ár. Einu sinni benti gamall karl á mig og sagði við gelgjustrák við hliðina á sér að ég væri sæt (ég dreif mig út á næstu stoppustöð bara). Í eitt skipti datt ég næstum út úr vagni þegar unglingsstrákur greip í neyðarhnappinn og opnaði hurðina á ferð. Oftar en ekki var maður í vagni þar sem einhver söng hátt og snjallt og alveg í eigin heimi og svo alveg sama um allt. Um daginn talaði eldri kona sem ég sat hjá við sjálfa sig og hló og hló og karl með 5 krakka og hund var skammaður fyrir að leyfa hundinum frekar að sitja í sæti en krökkunum.

Fór heim með strætó á föstudagskvöldið. Leið 51 úr Mjóddinni. Þetta var minnsti strætó í heimi held ég. Aðeins stærri en meðal sendibíll. Kannski er þetta svona Selfoss hnakkastyle bus – vantar bara spoilerinn og skyggðar rúður.

Ég fór í röð inní vagninn eins og fínar frúr gera í London en þá komu unglingastelpuskrípi og tróðust framfyrir mig. Og svo voru þær ekki með tilbúinn pening og allir þurftu að bíða meðan þær reyndu að telja saman klink….. í vettlingunum. Ég var pollróleg og sagði ekkert, best að verða ekki leiðinlega kellingin í bænum alveg strax. Ég borgaði 840 kr fyrir þessa reisu og þurfti að hlusta á endalausa píkuskræki og gemsasamtöl og svo rak eitt strákkvikindið við þannig að öskrin mögnuðust um helming og þennan líka fína skyndibitaprumpulyktarilm lagði um allan vagninn. Með ákveðinni hugleiðsluaðferð gat ég haldið sönsum og áran mín beið enga varnalega hnekki af þessu.
Annars hin fínasta ferð bara. Eina sem situr eftir eru áhyggjur af því að Úlfur greyið verði svona leiðinlegt útálandikrakkakvikindi þegar hann eldist. Þarf að skoða þetta aðeins betur en líst vel á svona skiptinemaprógramm til Perú eða Afríku.

Nú ætla ég að vera röflikelling. Er alltaf að sjá hryllingsmyndir af mat á forsíðunni á mbl.is.
Er þetta nú girnilegt?

mmmmmmmmm kjammsi kjamms
Miðað við stórfenglega lýsingu á réttunum þá eru myndirnar í engu samræmi. Þetta er eins og ég hafi sjálf tekið mynd af kattamatnum á þvottahúsgólfinu. Kálfa-, skinku- og sveppasósukássa ala mötuneytisstyle sveimér þá.

Obbosslega er ég mikil barnalandskerlingarherfa að vera að pæla í þessu hnussss

Man einhver eftir jóladagatali Glitnis? Það var þegar allir voru glaðir í bönkunum og maður fékk jólagjafir sendar heim. Ég vann aldrei baun í þessu blessaða dagatali en ég þekki tvær sem unnu einhverja forláta geisladiska eitt árið.
Núna er ég búin að vera pungsveitt við að taka þátt í allskonar jólaleikjum á netinu. Strumpadagatal, pressudagatalið, Nóa konfekt- og bókasníkjum á feisbúkk og ég er meira segja skráð í klósettpappírsleik papco. Ég brjálast ef ég vinn ekki eitthvað núna. Það tekur nú tíma að skrá sig í allt þetta drasl og mér sýnist að sá tími hefði verið betur nýttur í að fara í gegnum eitthvað sem er á gerilistanum hérna fyrir neðan hmmm.

Hvað sagði ég í fyrra????
Þetta hér……

Er ekki betri núna og stóð ekki við að kaupa gjafirnar og gera allt í október…… er komin með jóladrullusting finnst ég eiga eftir að gera svo margt.
Er með fólk á feisbúkk og þar eru allir að grobba sig yfir að vera búnir að kaupa gjafirnar og þeir eru að hafa það huggó með jólaöl og búnir að senda kortin og eru á leiðinni í jólahlaðborð eða á tónleika. Bang bang bang grrrrrrrrrrr……

Gerilistinn minn hljómar einhvernveginn svona (fyrir utan vinnu og daglegt stúss):
Þvo glugga að innan (kexklessur á neðstu gluggunum og bananar)
Skúra uppi og niðri (eftir að vera búin að ryksuga og greiða köttunum)
Þrífa ísskápinn (bugast bara við að hugsa um það)
Skreyta
Leysa jólaseríuflækjur
Reyna að laga jólaseríurnar
Kaupa nýjar seríur
Bóna bílinn
Þrífa bílinn að innan (sýnist ég þurfa háþrýstidælu og ferð á Sorpu eftir það verkefni)
Kaupa jólatré (Tolli vill risa tré sem á að standa við stigann og ná uppá næstu hæð)
Leigja kranabíl undir jólatréð
Kaupa meira jólaskraut
Skrifa út reikninga
Útbúa skemmtiatriði fyrir ættarjólaballið (ofsakvíðakast í aðsigi)
Kaupa jólamat og áramótamat og allskonar mat (prófa kannski að fara full út í búð eða sendi bara Tolla)
Henda öllum af feisbúkk sem eru búnir að öllu fyrir jólin
Föndra jólakortin
Finna heimilisföng og skrifa á öll jólakortin
Kaupa frímerki og senda allt draslið (vonandi fyrir jól)
Baka
Föndra
Brosa
Finna til jólafötin (ath. hvort þau séu laus við matarslettur og krumpur)
Kaupa gjafirnar
Skrifa aftur út hærri reikninga
Pakka inn gjöfunum
Gefa smáfuglunum
Fara í jólaklippingu
Þrífa bæði klósettin, baðið og sturtuna (andvarp)
Baka meira
Binda Úlf við sjónvarpssófann svo hann drasli örugglega ekki meira til fyrir jól

Jæja best að koma sér að verki.

Góðar stundir

Ég er afskaplega ljúf held ég og alveg sérstaklega umburðarlynd (eða svo segir Sigga systir) og verð sjaldan reið og ég hata að rífast. En ef ég verð reið þá verð ég reið. Varð svo reið í nótt að ég sá rautt. Einhver auli ákvað að opna hurð á húsinu klukkan þrjú og við það fór viðvörunarkerfið í gang. Hefði hjólað í viðkomandi og barið hann í harðfisk ef ég hefði séð til hans (hefði orðið jafn reið og í Birmingham um árið).

Eitt það ógeðslegasta sem ég veit er þegar er ráðist inní friðhelgi heimilis grrrrrrrrrrr sem betur fer á ég ekki byssu.

Ætlaði aldrei að geta sofnað aftur og er því sérstaklega fögur í dag með bauga niður á maga. Úlfur vaknaði líka og ég veit ekki hvort hann var hræddari við sírenuna eða gribbusvipinn á mömmu sinni en hann ætlaði heldur ekki að geta sofnað aftur.

Kettirnir fengu næstum ræpu af hræðslu við sírenuhljóðin greyin og eiga alveg sérstaklega bágt núna. Ósofnir og þurfa svo að fara út að spræna í þetta viðbjóðsveður.